Daily Archives: மார்ச் 14th, 2012

கூகுள் தேடல் டிப்ஸ்

கூகுள் தேடல் சாதனமே இன்று, உலகில் அனைவரும் விரும்பிப் பயன் படுத்தப்படும் தேடல் சாதனமாக இயங்கி வருகிறது. மிகக் குறைந்த நேரத்தில், இணையத்தில் இருக்கும் தளங்கள் அனைத்தையும் தேடி, நமக்குத் தேவையான தளங்களின் பட்டியல் தொகுப்பைத் தருவதில், கூகுள் தேடல் சாதனத்தை மிஞ்ச எதுவுமில்லை. இந்த தளத்தில் நம் தேடலை வழக்கமாக மேற்கொள்ளாமல், தேடலை செம்மைப் படுத்தினால், கூடுதல் தகவல்கள் கிடைக்கும். அவற்றை இங்கு காணலாம்.
link:URL (இணைய முகவரி) =அந்த முகவரிக்கு லிங்க் செய்யப்படும் மற்ற இணையப் பக்கங்களைப் பட்டியலிடும்.
related:URL = முகவரியில் உள்ள இணைய தளத்துடன் சம்பந்தப்பட்ட மற்ற தளப் பக்கங்களைப் பட்டியலிடும்.
site:domain.com “தேடப்படும் சொல்’ =தேடலை அந்த கொடுக்கப்பட்ட தளத்துடன் நிறுத்திக் கொள்ளும்.
allinurl:WORDS = இணைய முகவரியில் உள்ள அனைத்து தேடப்படும் சொற்கள் உள்ள தளங்கள் மட்டும் பட்டியலிடப் படும்.
inurl:WORD = like allinurl: மேலே சொல்லப்பட்ட தேடல் போலச் செயல்படும்; ஆனால் முதல் சொல்லுக்கான தேடல் முடிவுகளை மட்டும் கொடுக்கவும்.
allintitle:WORD = தலைப்பில் உள்ள சொற்களுக்கான முடிவுகளை மட்டும் காட்டும்.
intitle:WORD = மேலே சொல்லப்பட்ட தேடலைப் போல இருந்தாலும், அடுத்த சொல்லுக்கான தேடல் மட்டும் மேற் கொள்ளப்பட்டு முடிவுகள் காட்டப்படும்.
cache:URL = கூகுள் ஏற்கனவே, கொடுக்கப்பட்ட தள முகவரி சார்ந்து தன் கேஷ் மெமரியில் வைத்துள்ள பதிப்பினை மட்டும் காட்டும்.
info:URL =இணைய முகவரியைக் கொண்டுள்ள தேடல்கள் சார்ந்தவற்றை மட்டும் பக்கமாகக் காட்டும். கூகுள் தேடல் கட்டத்தில், ஓர் இணைய முகவரியினை டைப் செய்து தேடச் சொன்னால், என்ன தேடல் நடக்குமோ, அதே தேடல் இந்தக் கட்டளைக்கும் மேற்கொள்ளப்படும்.
filetype:SOMEFILETYPE =குறிப்பிட்ட பைல் வகைகளில் மட்டும் தேடப்படும்.
&filetype: SOMEFILETYPE = குறிப்பிடப்படும் பைல் வகையினை மட்டும் விடுத்து, மற்றவற்றில் தேடல் மேற்கொள்ளப் படும்.
site:www.somesite.net“+www.somesite.net”= இந்தக் கட்டளையில், கூகுள் உங்கள் தளத்தின் எத்தனை பக்கங்களை இன்டெக்ஸ் செய்துள்ளது என்று காட்டப்படும்.
allintext:= இணையப் பக்கங்களின் உள்ளாக மட்டுமே தேடல் நடத்தப்படும். அவற்றின் தொடர்பான தளங்களில் தேடல் மேற்கொள்ளப்பட மாட்டாது.
allinlinks: =லிங்க் தொடர்புக்குள்ளாக மட்டுமே தேடல் மேற்கொள்ளப்படும்.
Word A OR Word B =முதல் சொல் அல்லது இரண்டாவது சொல் என ஒன்றுக்கு மட்டும் தேடல் மேற்கொள்ளப்படும்.
“Word” OR “Phrase” = தரப்பட்டுள்ள சொல் அல்லது சொல் தொகுதி போலச் சரியாகத் தென்படுபவற்றை மட்டுமே தேடித்தரும்.
Word A Word B = முதல் சொல்லை (word A) கண்டறியும்; ஆனால் இரண்டாவது சொல்லையும் இணைத்து முடிவுகளை வடிகட்டித் தரும்.
Word A +Word B = முதல் மற்றும் இரண்டாவது சொற்கள் இணைந்து கிடைக்கும் இடங்களை மட்டும் தேடல் முடிவுகளாகக் காட்டும்.
~WORD = குறிப்பிட்ட சொல் மற்றும் அதனைப் போன்று பொருள் கொண்ட மற்ற சொற்களுக்காகவும் (synonyms) தேடும்.
~WORD WORD =சொல்லுக்கான அதே பொருள் தரும் சொற்களை மட்டும் தேடிக்காட்டும்.

நலம்தரும் நத்தைச்சூரி…

இயற்கையின் கொடையான புல் பூண்டு, செடி, கொடி, மரம், அனைத்தும் மனித இனத்திற்கு ஏதோ ஒரு வகையில் பயன்படுகிறது.  இவற்றில் பல நோய் தீர்க்கும் குணம் கொண்டவை.  சித்தர்கள் இவற்றை மூலிகைகளாகக் கொண்டு பல விதமான நோய்களை குணப்படுத்தி வந்துள்ளனர்.  மேலும் உடலுக்கு நோய் எதிர்ப்பு சக்தியையும், வலுவையும் கொடுக்கக்கூடிய கற்ப மூலிகைகளைப் பற்றிக் கூறியுள்ளனர்.  கற்பம் என்றால் உடலை நோயின்றி ஆரோக்கியமாக வைக்கும் முறை.  இந்த வகையில் கற்ப மூலிகைகள் பற்றி ஒவ்வொரு இதழிலும் அறிந்து வருகிறோம்.  இந்த இதழில் நத்தைச் சூரி என்னும் மூலிகை பற்றி அறிந்துகொள்வோம்.

இவை இந்தியா முழுவதும் காணப்படும் மூலிகையாகும்.  குறிப்பாக தமிழகத்தில் மணற்பாங்கான இடங்களில் அதிகம் வளர்கின்றது.  இது பூண்டு வகையைச் சார்ந்தது.

நான்கு பட்டையான தண்டுகளையும் எதிரடுக்கில் அமைந்த காம்பற்ற இலைகளையும், மிகச் சிறிய பூக்களையும் கொண்டதுதான் நத்தைச்சூரி.

இதனை குழி மீட்டான், தாருணி, கடுகம், நத்தைச்சுண்டி, தொலியாகரம்பை என பல பெயர்களில் அழைக்கின்றனர்.

கூச்ட்டிடூ    – Natthai Choori

Tamil    – Natthai Choori

English    – Shaggy button weed

Malayalam    – Thartuvel

Telugu    – Madana Ghettu

Sanskrit    – Madanghanta

Botanical Name – Spermacoce hispida

இதன் வேர் மற்றும் விதை மருத்துவப் பயன் கொண்டவை.

வேர் நோய் நீக்கும் தன்மை கொண்டது

விதை, உடல் சூட்டைப் போக்கி உடலுக்கு குளிர்ச்சியைக் கொடுக்கும்.  சீதபேதி, பெருங் கழிச்சலைப் போக்கும்.

உடல் தேற

நோயின் பாதிப்பிலிருந்து விடுபட்டு உடல் தேற நத்தைச்சூரியின் விதையைப் பொடித்து தினமும் 1 ஸ்பூன் அளவு எடுத்து தேனில் குழைத்து சாப்பிட்டு வரவேண்டும்.  இதனால் நோயின் தாக்கம் குறைவதுடன் உடலும் வலுப்பெறும்.

நத்தைச்சூரியின் விதையை லேசாக வறுத்து பொடியாக்கி வைத்துக்கொண்டு 1 ஸ்பூன் அளவு எடுத்து பாலில் கொதிக்க வைத்து அதனுடன் பனங்கற்கண்டு சேர்த்து காலை, மாலை இருவேளையும் அருந்தி வந்தால் உடல் சூடு தணிவதுடன் உடலில் உள்ள தேவையற்ற இரசாயன வேதிப் பொருட்கள் வெளியேற்றி, சிறுநீரகக் கல்லலைப்பு ஏற்படாமல் தடுக்கும்.  மேலும் இரத்தத்தைச் சுத்தப்படுத்தும்.

பெண்களுக்கு மாதவிலக்குக் காலங்களில் உண்டாகும் அதிக உதிரப் போக்கைத் தடுக்கும்.  வெள்ளைப் படுதலைக் குணமாக்கும்.

நத்தைச் சூரியின் விதையைப்பொடியாக்கி சம அளவு கற்கண்டுப்பொடி கலந்து காலையும், மாலையும் 1ஸ்பூன் அளவு சாப்பிட்டு வந்தால் வெப்பத்தினால் உண்டான வயிற்றுக்கடுப்பு, கழிச்சல் நீங்கும்.

10 கிராம் நத்தைச் சூரி வேரை காயவைத்து பொடியாக்கி பசும்பாலில் கலந்து கொதிக்க வைத்து அருந்தி வந்தால் தாய்ப்பால் பெருகும்.

நத்தைச்சூரி வேரை இடித்து 200 மி.லி. தண்ணீரில் கொதிக்க வைத்து 2 மணி நேரம் ஊறவைத்து வடிகட்டி தினமும் 50 மி.லியாக  நாள் ஒன்றுக்கு மூன்று வேளை குடித்து வர காய்ச்சல் மற்றும் நோயின் தாக்கம் குறையும்.

நத்தச்சூரி தைலம்

நத்தைச்சூரி வேர், நாயுருவி வேர், வன்னிவேர், உத்தாமணி வேர், தூதுவளை வேர், விளாவேர், பாகல் வேர், வேப்பம்பட்டை, கடுக்காய், மிளகு, வெள்ளுள்ளி, வசம்பு, திப்பிலி, குப்பைமேனி, துத்திவேர் இவற்றை சம அளவு எடுத்து இடித்து 1 லிட்டர் நல்லெண்ணெய் சேர்த்து காய்ச்சி வைத்துக்கொண்டு அடிக்கடி உடலில் தேய்த்து வந்தால் சரும பாதிப்பு நீங்குவதுடன் உடல் சூடு தணியும்.  தலையில் தேய்த்து குளித்து வந்தால் முடி உதிர்வது குறையும்.

நன்றி- ஹெல்த் சாய்ஸ்

நவீன வயர்லெஸ் சார்ஜர்


இன்றைய சொகுசு கார்கள் மற்றும் இதர வாகனங்கள் என அனைத்தும் பெட்ரோல், டீசல் மற்றும் கேஸ் ஆகிய மூன்று எரிசக்தி பொருட்களில்தான் ஓடுகின்றன. ஆனால், அசுர வேகத்தில் வளரும் மக்கள் தொகையின் காரணமாக பெருகிக்கொண்டிருக்கும் வாகனங்களை இயக்க இவை மூன்று மட்டும் போதாது.

இந்த பிரச்சினையிலிருந்து நம்மை காக்க ஆபத்பாந்தவனாய் வந்து நிற்பது மின்சக்தியில் இயங்கும் அதி நவீன கார்களும், இதர வாகனங்களும்தான். இக்கட்டில் உதவும் மின்சார கார்களிலும் சில பல சிக்கல்கள் இருக்கத்தான் செய்கின்றன. உதாரணமாக, ஜப்பானின் நிசான் நிறுவனத்தின் `நிசான் லீப்’ எனும் மின்சார காரை ஒரு முறை சார்ஜ் செய்தால் அது வெறும் 100 மைல்கள் வரைதான் ஓடும். அதுமட்டுமில்லாமல், இந்த காரை சார்ஜ் செய்ய பல மணி நேரங்கள் ஆகும்.

இந்த மின்சார காரை எடுத்துக்கொண்டு நெடுஞ்சாலையில் ஓரு நீண்ட பயணத்தை மேற்கொள்ள வேண்டும் எனும்போது சார்ஜ் செய்வது பெரும் சிக்கலாகி விடுகிறது. மின்சார கார்களுக்கு இருக்கும் இந்த நடைமுறை சிக்கலை தீர்க்க ஒரு அட்டகாசமான தொழில்நுட்ப வசதியை கண்டுபிடித்துவிட்டார் அமெரிக்காவின் ஸ்டான்போர்டு பல்கலைக்கழக ஆய்வாளர் ஷான்ஹுயி பேன்.

நெடுஞ்சாலையில் ஓடும் கார்களையும், லாரிகளையும் அவை ஓடிக்கொண்டிருக்கும்போதே சார்ஜ் செய்யும் அதி நவீன வயர்லெஸ் மின்சார சார்ஜரை உருவாக்குவதில் தொடக்கநிலை வெற்றி கண்டிருக்கிறது ஷான்ஹுயி ஆய்வுக்குழு.

நெடுஞ்சாலைகளில் பொருத்தப்படக் கூடிய உலோக காயில்கள் கொண்ட இந்த வயர்லெஸ் சார்ஜரை நெடுஞ்சாலைகளில் பொருத்திவிட்டால், மின்சார சார்ஜிங் பூத்துகளை தேடி நாம் அலைய வேண்டியதில்லை! நெடுஞ்சாலைகளை அடைந்துவிட்டாலே போதும், நம் கார்கள் ஓடிக்கொண்டிருக்கும் போதே சார்ஜ் ஆகிவிடும்.

இதில் விசேஷம் என்னவென்றால், இடையில் சார்ஜ் தீர்ந்துபோகும் பிரச்சினையெல்லாம் கிடையாது. வாகனங்களை நாம் தொடர்ந்து ஓட்டிக்கொண்டே இருக்கலாம். நம் பயணம் முடியும்போது, நம் பாட்டரியில் நாம் தொடங்கியபோது இருந்ததைவிட அதிகமான சார்ஜ் இருக்கும்!

இந்த வயர்லெஸ் சார்ஜரில், பல அடிகள் இடைவெளி விட்டு பொருத்தப்படக்கூடிய இரு காப்பர் காயில்கள் உண்டு. இந்த காயில்களில் ஒன்று நெடுஞ்சாலையிலும், மற்றொன்று ஓடும் காரின் அடியிலும் பொருத்தப்பட்டிருக்கும். நெடுஞ்சாலையில் பொருத்தப்பட்டிருக்கும் காயிலுக்கு மின்சார இணைப்பு கொடுக்கப்படும்.

இந்த மின்சார காயிலை, நெடுஞ்சாலை கார்கள் அதிவேகத்தில் கடந்து செல்லும்போது, இரு காயில்களும் ஒரே அலைவரிசையில் அதிரும் வண்ணம் முதலில் தூண்டிவிடப்படும். பின்னர், நெடுஞ்சாலை காயிலின் மின்சாரத்தால் உருவாகும் காந்த அலைகள் காரில் உள்ள மற்றொரு காயிலை அதிரச் செய்யும்.

இந்த அதிர்வுக்கு `மேக்னடிக் ரெசொனன்ஸ்’ என்று பெயர். இந்த அதிர்வினால், நெடுஞ்சாலை காயிலிலிருந்து வெளியாகும் மின்சார சக்தியானது காற்று மூலமாக, சில அடிகள் இடைவெளியில் சென்று கொண்டிருக்கும் காரில் உள்ள காயிலுக்கு செல்கிறது. காரில் உள்ள காயிலுக்குச் செல்லும் மின்சாரம் காரின் பாட்டரியை சார்ஜ் செய்துவிடும். இந்த மின்காந்த தொழில்நுட்பத்துக்கு `மேக்னடிக் ரெசொனன்ஸ் கப்லிங்’ என்று பெயர்.

கடந்த 2007-ம் ஆண்டு அமெரிக்காவின் MIT தொழில்நுட்ப நிறுவனத்தில், மேக்னடிக் ரெசொனன்ஸை பயன்படுத்தி 6 அடிகள் இடைவெளியுள்ள இரு காயில்கள் மூலம் ஒரு 60 watt பல்பை எரியச் செய்தனர். முக்கியமாக, இதில் உருவாகும் மின்காந்த அலைகளால் மனிதர்களுக்கு எந்த பாதிப்பும் ஏற்படவில்லை என்பது குறிப்பிடத்தக்கது. இந்த சோதனையின் வெற்றிதான் `மேக்னடிக் ரெசொனன்ஸ் கப்ளிங்’ தொழில்நுட்பத்துக்கு பிள்ளையார் சுழி போட்டது. இந்த MIT ஆய்வாளர்கள் குழு உருவாக்கியிருக்கும் ஒரு நிறுவனம், இதே தொழில்நுட்பத்தைக் கொண்டு கேரேஜில் அல்லது தெருவில் நிறுத்தப்பட்டிருக்கும் ஒரு வாகனத்துக்கு 3 kilo watts மின்சாரத்தை வயர்லெஸ் முறையில் செலுத்த முடியுமா என்று முயற்சித்துக்கொண்டிருக்கிறது.

ஆனால் ஆய்வாளர் ஷான்ஹுயி பேன் குழுவினர், இந்த தொழில்நுட்பத்தை பயன்படுத்தி 6.5 அடிகள் இடைவெளியில், நெடுஞ்சாலையில் ஓடும் கார்களுக்கு 10 kilo watts மின் சாரத்தை வயர்லெஸ் முறையில் செலுத்த முடியுமா என்று முயற்சித்தனர். இந்த ஆய்வின் முதற்கட்டமாக, நெடுஞ்சாலையில் அதிவேகத்தில் ஓடும் கார்களுக்கு மின்சாரம் செலுத்தும் வயர்லெஸ் சார்ஜரை பிரதிபலிக்கும் வகையில் ஒரு கம்ப்யூட்டர் மாடல் கொண்டு ஆய்வு செய்யப்பட்டது.

ஆய்வின் முடிவில், இந்த தொழில்நுட்ப செயல்முறை மூலம் 10 kilo watts மின்சாரத்தை சுமார் 97 சதவீதம் அளவிற்கு வெற்றிகரமாக வயர்லெஸ் முறையில் செலுத்த முடியும் என்று நிரூபிக்கப்பட்டது. இந்த ஆய்வின் அடுத்த கட்டம், இந்த செயல்முறையை நெடுஞ்சாலைகளில் செயல்படுத்தி பார்ப்பதுதான். இந்த சோதனையிலும் வெற்றிகண்டுவிட்டால் நெடுஞ்சாலை வயர்லெஸ் கார் சார்ஜர் ரெடி!

முனைவர் பத்மஹரி

காலம் அறிந்து காரியம் செய் -கவியரசு கண்ணதாசன்

காலங்கள் கடவுள் பாடும் ராகங்கள், அவை வீணடிக்கப்பட்டு விட்டால் திரும்பக் கிடைப்பதில்லை.

ஒரு வருஷம் முடிகிறது என்றால், ஒரு வயது முடிகிறது என்று பொருள்.

வயதுக்கு ஏறுகிற சக்தி உண்டே தவிர, இறங்குகிற சக்தி கிடையாது.

எத்தனை வயது வரை ஒருவன் வாழ்ந்தான் என்பது கேள்வியல்ல; ஒவ்வொரு வயதிலும் அவன் என்ன செய்தான் என்பதே கேள்வி.

மராட்டிய வீரன் சிவாஜியின் வயதைப்பற்றி யார் கவலைப்பட்டார்கள்? அவன் நடத்திய வீர சாகஸங்கள் வரலாறாயின!

ஆதிசங்கரர் சமாதி அடையும்போது வயது முப்பத்து இரண்டுதான்.

ஆனால், அந்த வயதுக்குள் அவர் ஆற்றிய காரியங்களின் பயனே இன்றைய பீடங்கள்.

இந்து தர்மத்தின் மறுமலர்ச்சிக்கு ஆதிசங்கரர் ஒரு மைல்கல்.

இந்தியாவின் தேசிய ஒருமைப்பாட்டுக்கு இலக்கணம் வகுத்தவரும் அவரே.

வயதுகள் கூடலாம், குறையலாம்; ஆனால் ஓடுகிற வருஷங்கள் உருப்படியான வருஷங்களாக இருக்க வேண்டும்.

இன்ன ஆண்டில், இன்ன காரியம் நடந்தது என்று வரலாறு எழுதப்படுமானால், அந்த வரலாற்றில் எங்காவது ஒரு மூலையில் நம்முடைய பெயர் இருக்க வேண்டும்.

உண்டோம், உறங்கினோம், விழித்தோம் என்று வாழ்கிறவர்கள் விலங்குகளே!

பயனற்ற காரியங்களில் பொழுதைச் செலவழிப்போர் பயனற்ற பிறவிகளே!

எந்தக் காரியத்தை எந்தக் காலத்தில் செய்ய வேண்டுமோ, அந்தக் காலத்தில் செய்துவிட வேண்டும். இல்லையேல் பின்னால் வருந்த நேரிடும்.

எனது இளமைக் காலங்கள்- அவற்றை நான் எண்ணிப் பார்க்கிறேன்.

எழுத உட்கார்ந்தால் மளமளவென்று என் கைப்படவே நாற்பது ஐம்பது பக்கங்கள் எழுதியதை எண்ணிப் பார்க்கிறேன்.

பரபரப்பான நடை; சுறுசுறுப்பான சிந்தனை; துருதுருவென்றிருந்த மூளை.

எல்லாவற்றையும் எண்ணிப் பார்க்கிறேன்.

அவை, எவ்வளவு வீணாகி விட்டன என்பதை எண்ணும் போது, `இறைவா, இன்னொரு முறை இளமையைத் தர மாட்டாயா?’ என்று கெஞ்சத் தோன்றுகிறது.

`அதைப் புத்தகமாக எழுத வேண்டும். இதைப் புத்தகமாக எழுத வேண்டும்’ என்றெல்லாம் இப்போது ஆசை பெருக்கெடுத்து ஓடுகிறது.

திடீர் திடீரென்று உடம்பு சோதனை செய்கிறது.

இந்தச் சோதனை இல்லாத காலங்களில் பயனற்ற அரசியல் கட்டுரைகளை எழுதினேன்; பயனற்ற மேடைகளில் காட்சியளித்தேன்; வீண் வம்புகளில் ஈடுபட்டேன்; விளையாட்டுகளையே வாழ்க்கை என்று கருதினேன்.

சிந்தனைகளைச் செயல்படுத்தும் ஆசைகள் வளர்ந்தபோது அந்தச் சக்தியை வழங்க, உடம்பு அடிக்கடி மறுக்கிறது.

இரணியனுக்கும் பிரஹலாதனுடைய வயதிருந்தால் அவன் நரசிம்ம அவதாரத்துடனேயே சண்டை போட்டுப் பார்த்திருப்பான்.

அறிவும் உணர்ச்சியும் தாமதித்தே வருகின்றன; ஆனால், காலம் முந்திக் கொண்டு வருகிறது.

இருபது வருஷங்களுக்கு முன்பு குமரியாக இருந்தவள் இப்போது கிழவியாகக் காட்சியளிக்கிறாள்.

அப்போது அவளுக்காக ஏங்கிய ஆடவர்களும், இப்போது அவளிடம் ஆத்ம விசாரம்தான் பேச முடிகிறது.

முன்பு எனக்கு வந்த வருமானம் இப்போது இல்லை.

அந்த வருமானத்தை நான் செலவழித்த போது இதே போல் வந்து கொண்டே இருக்கும் என்று கருதினேன்.

ஆனால், அந்தக் காலத்துக்கும் இந்தக் காலத்துக்கும் உள்ள பேதம் இப்போதுதான் புரிகிறது.

மலர் பூத்தவுடனேயே அது கூந்தலுக்குப் போகாவிட்டால், அது வாடியவுடனேயே காலடியில் விழத்தான் வேண்டியிருக்கும்.

ஈயம் பத்திரமாக இல்லாவிட்டால், அது பேரீச்சம் பழத்துக்குத்தான் விலையாக இருக்கும்.

குருஷேத்திரம் எப்போது நடந்தது?

பாண்டவர்கள் வனவாசம் முடிந்த பிறகு.

அதற்கு முன்னாலேயே கண்ணன் அந்தப் போரைத் துவக்கி இருக்கலாம். ஆனால் அந்தக் காலம், யுத்த தர்மத்திற்கு நியாயமான காலமாக இருக்காது.

இரண்டாவது உலக யுத்தத்தை ஹிட்லர் தொடங்கிய காலம் அற்புதமான காலம்.

அவன் திட்டம் ஒழுங்காக இருந்திருக்குமானால் அவனே உலகத்தின் ராஜா!

அதுபோலவே, தாமதித்து அமெரிக்கா போரில் இறங்கின காலமும் அற்புதமான காலம்.

பங்களா தேசத்துக்குள் இந்தியா புகுந்த காலமே அருமையான காலம். அதற்கு முந்தி இருந்தால் உலகத்தின் வசை இருந்திருக்கும்; பிந்தி இருந்தால் இந்தியப் பொருளாதாரம் நாசமாகி இருக்கும்.

இளம் பருவத்தில் பைரன் ஒரு இளம் பெண்ணைக் காதலித்தான்; அவள் மறுத்து விட்டாள்.

நாற்பது வயதுக்கு மேல் அவளே அவனைத் தேடி வந்தாள் ஆசையோடு; அவன் மறுத்து விட்டான்.

சகல வசதிகளும் படைத்த இராவணன், சீதையின் சுயம்வரத்திற்கு முன்பே அவளை சிறையெடுத்திருந்தால் அவன் மீது பழி வந்திருக்காது. ஒரு வேளை சீதையே அவனை ஏற்றுக் கொண்டிருக்கக் கூடும்.

அரசாங்க வேலையில் சேருவதற்குக் குறிப்பிட்ட ஒரு வயது நிர்ணயித்திருக்கிறார்கள். அந்த வயது கடப்பதற்கு முன்னாலேயே அதில் சேர்ந்து விடவேண்டும். காலம் போய்விட்டால், பிறகு கடைகளில் தான் வேலை பார்க்க வேண்டிவரும்.

சபரிமலை, ஜோதி கூட ஒரு குறிப்பிட்ட நாளில்தான் தெரிகிறது; தினசரி தெரிவதில்லை.

காலத்தின் பெருமையை உணர்ந்தவன்தான் காரியத்திலும் பெருமை கொள்ள முடியும்.

இன்று நான் செய்யும் புத்தகப் பணிகளைப் பத்து ஆண்டுகளுக்கு முன் நான் துவங்கியிருந்தால், எதிர்கால மாணவன் சிலப்பதிகாரத்திற்கும், மணிமேகலைக்கும் என் உரையைத்தான் படிப்பான்.

`இப்போது திருக்குறள் உரையை மட்டுமாவது எழுதி முடித்து விட முடியாதா?’ என்று தோன்றுகிறது.

`முடியும்’ என்ற நம்பிக்கை இருக்கிறது.

ஆரம்பத்தில் இருந்தே எனது சினிமாப் பாடல்களையும், இசைத் தட்டுக்களையும் தொகுத்து வைத்திருந்தால், இன்று இது ஒரு தனி `லைப்ரரி’ ஆகியிருக்கும்.

முறையாக 1944-ல் இருந்தே நான் டைரி எழுதத் தொடங்கி இருந்தால், உலகத்தில் வேறு எவனுக்கும் இல்லாத வரலாறு எனக்கு இருப்பதை உலகம் கண்டு கொண்டிருக்கும்.

வெள்ளம் போல வருமானம் வந்தபோது ஒரு தோட்டத்தையும் வாங்கி, ஒரு கிருஷ்ணன் கோயிலையும் கட்டி வைத்திருந்தால், இப்போது அந்த ஆசையால் வெந்து சாக வேண்டியிருக்காது.

அப்போது குழந்தைகள் பெயரால் குறைந்த பட்ச டெபாசிட் போட்டிருந்தால்கூட, மரணத்தைப் பற்றிய நினைப்பு வரும்போது குழந்தைகளைப் பற்றிய கவலை வராது.

அப்போது வாங்கிய சொத்துகளை விற்காமல் இருந்திருந்தால் கூட இப்போது எதிர்காலத்தைப் பற்றிய கவலையிராது.

அப்போது காலம் கனிவாக இருந்தது.

பணம் வந்தது; உடம்பு துடிதுடிப்பாக இருந்தது; `போனால் போகட்டும் போடா’ என்ற புத்தியும் இருந்தது.

இப்போது பழங்கணக்குகள் பரிசீலிக்கப்படுகின்றன.

பாய்மரக் கப்பல், காற்றை நம்பிப் போய்க் கொண்டிருக்கிறது.

புயல் காலத்தில் வானளாவி எழுந்த அலைகள், இப்போது அமைதியாக நாக நர்த்தனமாடுகின்றன.

நம்முடைய நண்பர்களும் காலங்களே; பகைவர்களும் காலங்களே.

காலங்களே தருகின்றன; அவையே பறிக்கின்றன.

காலங்களே சிரிக்கச் செய்கின்றன; அவையே அழவும் வைக்கின்றன.

`ஞாலம் கருதினும் கைகூடும்; காலம்
கருதி இடத்தால் செயின்’

என்றான் வள்ளுவன்.

காலம் பார்த்துக் காரியம் செய்தால், பூமியையே விலைக்கு வாங்கலாம்.

பத்து வருடங்களுக்கு முன்னால் கேரளாவில் பரபரப்பான கொலை ஒன்று நடந்தது.

கேரளா முழுவதிலும் அதைப்பற்றிய பேச்சாகவே இருந்தது. அடுத்த மாதமே அதைக் கதையாக எழுதிப் படமாக எடுத்து விட்டார் ஒருவர். அவர் லட்சாதிபதியாகி விட்டார்.

கைவண்டிக்காரர்கள் காய்கறி விற்கிறார்கள்; மாம்பழ சீஸன் வந்தால் மாம்பழம் விற்கிறார்கள்.

பனிக்காலத்தில் ஐஸ் கட்டியையும், காற்றடிக்கிற காலத்தில் மாவையும் வியாபாரம் பண்ணக்கூடாது.

`முறைகோடி மன்னவன் செய்யின்; உறைகோடி
ஒவ்வாது வானம் பெயல்’

-என்றான் வள்ளுவன்.

சித்திரை வைகாசி மாதங்களில் ஏரி குளங்களைத் தூரெடுக்க வேண்டும். அப்படித் தூரெடுக்கத் தவறினால், ஐப்பசி கார்த்திகையில் பெய்கிற மழைத் தண்ணீர் குளங்களிலும், ஏரிகளிலும் தங்காது.

வானம் பார்த்த பூமியில் பங்குனி மாதம் விதை விதைக்கின்றவன் விதைத்த விதையையும் சேர்ந்தே இழப்பான்.

`ஆடிப் பட்டம் தேடி விதை’ என்பார்கள்.

ஆவணியில் தண்ணீர் இறைத்தால் போதும், புரட்டாசியில் இருந்து மழை உதவி செய்துவிடும்.

காலங்களிலேயே காரியங்களின் வெற்றி தோல்விகள் அடங்கி இருக்கின்றன.

நல்ல பெண் கிடைக்கும் போது திருமணத்தை முடிக்காமல் விட்டுவிட்டால், பிறகு எந்தப் பெண் கிடைத்தாலும் போதும் என்ற நிலைமை வந்து விடும்.

காலத்தால் கிடைக்கும் நல்ல நண்பர்கள் மீண்டும் கிடைக்க மாட்டார்கள்.

இராவணன் தோற்ற பிறகு விபீஷணன் ராமனைத் தேடி வந்திருந்தால், ராமனே அவனை ஒரு அடிமையாகத்தான் நடத்தி இருப்பான்.

காலம் பார்த்து சுக்ரீவன், ராமனைச் சேராமல் இருந்திருந்தால், வாலி வதமும் நடந்திருக்காது; சுக்ரீவனுக்குப் பட்டமும் கிடைத்திருக்காது.

கம்சன் போட்ட தவறான காலக் கணக்கினால் தான் கிருஷ்ணாவதாரம் நமக்குக் கிடைத்தது.

காலத்தின் கருணையால்தான் அசுரக் கூட்டம் அழிந்தது.

காலத்தைச் சரியாகப் பிடித்துக் கொண்டால், தெருப் பிச்சைக்காரியும் மகாராணியாகலாம்.

சினிமா உலகிலேயே நான் பார்க்கிறேன். காலத்தால் தவறான ஆட்களைச் சந்தித்து, கல்யாணம் என்ற பெயரில் வாழ்வு இழந்து போன நடிகைகளும் உண்டு. பெரும் பணக்காரர்களைப் பிடித்துக் கொண்டு உலகம் முழுவதும் விஜயம் செய்யும் நடிகைகளும் உண்டு.

அதிர்ஷ்டம் என்பது வேறொன்றுமில்லை; வருகின்ற காலத்தை ஒழுங்காகப் பிடித்துக் கொள்வதே.

நீங்கள் அதிர்ஷ்டக்காரர்களா என்பதைச் சோதிக்கக் காலம் அறிந்து காரியம் செய்தீர்களா, என்பதை எண்ணிப்பாருங்கள்.